زمان يا حب..


رغدة السعيد

هل حب زمان أحلى من حب اليومين دول؟ لما فريد الأطرش قال: زمان يا حب.. ياما غلبت فيا، وقال: وياك ياحبيبى لقيت أمان وصحبة وأهل وبيت.. هوده حب اليومين دول؟ ولا حب اليومين دول دبدوب وهدية وشوكولاتة؟

الحب موجود في قلوبنا من رحمة ربنا علينا وعامل زي الألماس بس ساعات كتير النفس بتتكبر ومش بتتنازل عن ماديات، ووجود السوشيال ميديا ومشاكلها وأسرارها عملت طبقة من التراب على الألماس، سرعة الحياة وتراكم مشاكلها وتغيير نمط البشر إلى الأسرع والأسهل وصلتنا لحالة كسل أننا نشيل التراب فيظهر الألماس.

فيه حبيب بيطبطب على حبيبه لو وقع وحبيب تاني بيقوم حبيبه لما يقع، أما الحبيب التالت بيسند حبيبه قبل أما يقع (وده النوع النادر).

النوع الأول: هو الحبيب السطحي اللي بيهتم بمظاهر الحب حبيبته تقول له: أنا متضايقة دلوقتي مش قادرة أتكلم يقولها: خلاص يا حبيبتي لما تهدي كلميني. والحوار الصغير ده لخص العلاقة. والعكس صحيح طبعاً لأن العلاقة طرفان وعلي رأي المثل الغربي: "رقص التانجو يحتاج اثنين".

النوع الثاني: بيكون نوع حنين شوية وميقدرش يستحمل زعل الحبيب فلما بتقوله حبيبته: متضايقة دلوقتي مش قادرة أتكلم بيصمم يعرف ما لها وممكن هي تقول أو متقولش. والنوع ده يعتبر موجود في الحياة.

أما النوع التالت بقي فهو الحبيب اللي مش بيسمح لحبيبه أنه يتضايق والعكس صحيح حبيبه بيقول له على اللي جواه على طول من غير حوارات وده نوع نادر الوجود..
وهرجع تاني هنا لنمط الحياة السريع ومشاكلها وأسرار السوشيال ميديا ومبدأ كل واحد فيه اللي مكفيه. مع العلم أنهم لو شالوا هم بعض هيتقسم الهم والحمل عليهم وبالتالي الحياة هتكون أسهل بكتير عليهم.

وخلصنا الكلام عن الحبيب والحبيبة نيجي بقى للحب هل إحنا اللي ظلمنا الحب زي الست أم كلثوم ما قالت ولا فعلاً الحب ده أمان وصحبة وأهل وبيت زي ما الأستاذ فريد الأطرش قال؟!
مفتاح الحب في التروس اللي بتحييه والتروس طرفان المودة والرحمة غذاء للحب، التقدير من الطرفين وقود الحب، العطاء المقدر (للي يستاهل) هوالمفتاح لتشغيل التروس.
آفة الحب هي الحق المكتسب وده بيكون بداية النهاية للعلاقة، طرف يعطي ببذخ والطرف الآخر يأخذه كحق مكتسب، فإن أعطي أقل وهو الطبيعي دخلوا في دائرة الحق المكتسب.
أرقى أنواع الحب هو الحب العزيز الغالي واللي مش محتاج إظهاره عن طريق صور السعادة الفظيعة عالفيس بووك وكلام منمق في أعياد الزواج، ولا أعني الحب في السر، أعني الحب الكافي الذي لا يحتاج لتأكيده أمام أحد، لوحاسس إن العلاقة مش ناجحة الصور وإظهارها ناجحة لن يفعل شيئاً لها.

إحنا مش محتاجين يوم للحب كعيد الحب أو"الفلانتين" عشان نقول "بحبك" للي بنحبهم. الحب موجود في قلوبنا (المفروض) طول السنة. يمكن اليوم ده بينعش الحب الموجود للبعض، بيجدده، إنما يوجده تاني في القلوب صعب.
أجمل ما قيل في الحب في الأغاني:
"أنا كنت عبدك في عز ضعفك وكنت يوم التجلي سيدك".

منتهى الرقي والخضوع والاحتواء والضعف القوي. أيوه الضعف القوي، الضعف اللي يقوي الحبيب الآخر والقوة اللي تشد حيله تاني..
"اوعوا تخسروا الحب عشان خايفين تخسروه، جملة غريبة بس من واقع الحياة" ساعات كتير بنخسر حاجات غالية علينا من كتر ما إحنا خايفين نخسرها بنخاف نقرب، بنكتفي بمسافات بسيطة، بنخاف نواجه لا يكون فيه كلام لازم يكون آخر كلام يتقال.

واجهوا حبوا وقولوا الحياة قصيرة إن إحنا نداري مشاعرنا.
- الغيرة حب والشك مش حب
- العطاء حب والحق المكتسب مش حب
- الضعف حب والاستقواء مش حب
- الشجن حب والنكد مش حب
- الشوق حب والألم مش حب

الناس مفتقدة الحب بس لازم تعرف إن الحب حقيقة مش زي الأفلام إلا ما قد ندر، وممكن يكون أحلى من الأفلام لوفيه ثقة واحترام وإيثار نفس ومودة ورحمة.

مش لازم لو هتحتفلوا بعيد الحب ورد كتير وغالي، وردة مع حب حقيقي أغلى بكتير.

ممكن نكون بنسخر ونهزر على عيد الحب ولكن من وراء قلبنا من كتر اللي شفناه من الحب. عايزين تحتفلوا احتفلوا وافرحوا بس مش يوم واحد بس.. ولو حاسين إن اليوم ده هيفرق معاكم أو يجدد حبكم احتفلوا بس احتفلوا من قلبكم مش مجرد مظاهر.

ببساطة مش هتنام الليل طول ما انت بتحب (طبعاً مش من الناموس أو الصداع) بس لأن الواقع بتاعك أصبح أحلى من الحلم أو الخيال.

أسمى كلام قيل في الحب: "إني رُزقت حبها" عن السيدة خديجة أم المؤمنين من سيدنا محمد عليه الصلاة والسلام.

حبوا نفسكم عشان تعرفوا تحبوا الآخرين..







أضف تعليقك

باحثة في لغة الجسد و مدربة مهارات البشرية